छत्रपती संभाजीनगर (औरंगाबाद): विद्रोही साहित्य संमेलनाच्या बोधचिन्हातून भारतीय बहुसांस्कृतिक बहुविविधतेचे प्रतिबिंब आहे. यातून बुध्दाची करूणा आणि परिघाबाहेर ढकलेल्यांच्या वेदनेचा विद्रोह प्रतित होतो, असे प्रतिपादन ज्येष्ठ विचारवंत प्रा. डॉ. मुस्तजीब खान यांनी केले.
१९ व्या अखिल भारतीय विद्रोही मराठी साहित्य संमेलनाच्या बोधचिन्हाचे प्रकाशन आज अभ्यासक, विचारवंत डॉ. प्रा. मुस्तजीब खान यांच्या हस्ते करण्यात आले. हे बोध चिन्ह चित्रकार राजानंद सुरडकर यांनी रेखाटले आहे. विद्रोही साहित्य संमेलनाच्या या बोधचिन्हातून सांस्कृतिक क्रांती घडवली आहे. अजिंठ्याच्या पद्मपाणी बुध्दाच्या हातात पिंपळ पानाऐवजी लेखणीची मशाल दिली आहे. सोबतच या शहराची ठळक ऐतिहासिक ओळख असलेल्या बीबी का मकबऱ्याचा मिनारही दर्शवला आहे. संविधानाची मोडतोड सुरु आहे. या जळत्या वास्तवालाही या बोधचिन्हातून दर्शवले आहे, असे डॉ. मुस्तजीब खान म्हणाले.
विद्रोही सांस्कृतिक चळवळीचे राज्य कार्यकारी संघटक किशोर ढमाले यांनी प्रास्ताविक केले. चित्रकार राजानंद सुरडकर यांनी विद्रोही साहित्य संमेलनाच्या बोधचिन्हासह ईतरही साहित्य संमेलनाचे बोधचिन्ह रेखाटले आहे. या बोधचिन्हातून विद्रोहाचा वारसा अधिक प्रखरपणे पुढे आणला आहे, असे ढमाले म्हणाले.
यावेळी सूर्यकांता गंगाधर गाडे, संजय जाधव, संमेलनाचे स्वागताध्यक्ष सतीश चकोर, चित्रकार राजानंद सुरडकर, मुख्य निमंत्रक अॕड.धनंजय बोरडे, अनिलकुमार बस्ते, के.ई.हरिदास, प्रा.भारत सिरसाठ, धोंडोपंत मानवतकर, कार्याध्यक्ष खालीद अहमद, सुधाकर निसर्ग, भीमराव गाडेकर, सविता अभ्यंकर, राष्ट्रपाल वानखेडे, अनिल वानखेडे, वजीर शेख, कवि सुनील उबाळे यांची प्रमुख उपस्थिती होती.
बोधचिन्हाचे वैशिष्ट्ये काय?
१९ व्या विद्रोही साहित्य संमेलन भारतीय संविधानाला समर्पित आहे. संविधानाने प्रत्येक माणसाला समान लेखून समता, न्याय, बंधूता, मैत्री, वैज्ञानिक दृष्टिकोन ही मूल्ये दिली आहेत. चित्रकार राजानंद सुरडकर यांनी रेखाटलेल्या या बोधचिन्हात भारतीय संविधानाच्या पार्श्वभूमीवर जगाला स्तब्ध करून टाकणाऱ्या अजिंठा लेणीतील पद्मपाणी बुध्दाचा अनुकंपेचा हात आहे. या हातात कालानुरूप ‘स्वयं दिप हो’ या वचनाला अधोरेखित करणारी लेखणीची मशाल दाखवली आहे. ही लेखणीची मशाल एकाच वेळी ‘स्वयंदीप’ होण्यासाठी व प्रज्ञेने सर्वंकष अंधार जाळण्याची प्रेरणा आहे. गुलामीच्या तुटलेल्या श्रृंखला, बीबी का मकबऱ्याचा एक मिनार दर्शवला आहे.
