मुंबई: पुण्यातील डॉ. बाबासाहेब आंबेडकर संशोधन व प्रशिक्षण संस्थेमार्फत (बार्टी) महाराष्ट्र लोकसेवा आयोगाच्या न्यायिकसेवा स्पर्धा परीक्षेपूर्व प्रशिक्षणाकरिता सामायिक प्रवेश परीक्षा म्हणजेच ‘सीईटी २०२५’ जाहीर करण्यात आली आहे. इच्छूक उमेदवारांना २५ ऑगस्टपर्यंत विहित नमुन्यातील अर्जासह सर्व कागदपत्रे सादर करणे बंधनकारक आहे.
लोकसेवा आयोगाच्या न्यायिकसेवा स्पर्धा परीक्षेपूर्व प्रशिक्षणासाठीची जाहिरात बार्टीने २९ जुलै रोजी प्रसिद्ध केली असून अर्ज प्रक्रिया १ ऑगस्टपासून सुरू झाली आहे. सर्वोच्च न्यायालयाच्या २० मे रोजीच्या आदेशानुसार, ‘न्यायिकसेवा सीजे-जेडी’ व ‘जेएमएफसी’ परीक्षेस पात्र होण्यासाठी किमान तीन वर्षांचा कायदेशीर सराव अनिवार्य करण्यात आला आहे.
या आदेशाच्या पार्श्वभूमीवर उमेदवारांनी अर्ज सादर करताना सनद आणि न्यायालयीन सरावाचा दाखला जोडणे आवश्यक आहे. ज्या उमेदवारांनी आधीच ऑनलाईन अर्ज भरले आहेत, त्यांनी अर्जाची प्रत, सनद आणि अनुभव प्रमाणपत्र २५ ऑगस्टपर्यंत bartijmfc@gmail.com या ईमेलवर सादर करणे बंधनकारक आहे.
निर्धारित मुदतीत आवश्यक कागदपत्रे सादर न केल्यास उमेदवाराचा ‘सीईटी २०२५’ साठी विचार केला जाणार नाही, अशी माहिती बार्टी संस्थेकडून देण्यात आली आहे.
